Nos Guichardus, miles, Petrus, Johannes et Guillelmus, fratres, filii quondam Achardi de Maciaco, militis defuncti, notum facimus universis presentes litteras inspecturis, quod cum venerabilis in Christo pater Yvo, abbas Cluniacensis, contra nos assereret et etiam reclamaret quod Achardus predictus, quondam pater noster, possessiones et jura quedam de feudo quo[d] idem quondam pater noster ab ipsa ecclesia Cluniacensi tenebat existentia alienasse seu extra manum suam posuisse, absque ipsius abbatis Cluniacensis aut alicujus predecessorum suorum abbatum Cluniacensium licentia et assensu, in dicte Cluniacensis ecclesie prejudicium et gravamen, idemque abbas jus quod dicte ecclesie Cluniacensi ratione alienationis hujusmodi contra nos competere poterat, prosequi contra nos intenderet vel pararet, nos volentes nobis providere super hoc et cavere, eidem abbati ecclesie Cluniacensis nomine promissionis et promittimus per juramenta super sancta Dei euvangelia a nobis corporaliter ad hoc prestita, quod primitus inspecta littera seu carta super predicto feudo confecta, si appareat possessiones vel jura aliqua de feudo supradicto per nos vel aliquem nostrum aut dictum quondam patrem nostrum alienatas esse seu extra manum nostram positas in dicte Cluniacensis ecclesie prejuditium et gravamen, nos de eisdem possessionibus et juribus sic alienatis et extra manum nostram positis aut aliis possessionibus et juribus nostris de proprio nostro allodio equivalentibus plene et integre seu perfecte reintegrabimus feudum supradictum vel alias gratiam abbatis Cluniacensis plene super hoc faciemus, infra tres menses postquam a dicto abbate vel suo seu ecclesie Cluniacensis mandato nos vel alter nostrum super hoc fuerimus requisiti vel etiam requisitus, ad hec nos et heredes seu successores nostros et omnia bona nostra mobilia et immobilia, habita et habenda, ubicumque sint et fuerint specialiter obligantes. Abrenunciamus autem in hac parte pro nobis et heredibus et successoribus nostris doli, metus et in factum exceptionibus et omni auxilio juris canonici et civilis promulgati et promulgandi et consuetudini inducte et inducende que nobis possunt in hac parte contra dictam Cluniacensem ecclesiam competere et prodesse et juri dicenti: generalem renunciationem non valere. Et quia sigilla propria non habemus, sigillum reverendi in Christo patris Guichardi, Dei gratia episcopi Matisconensis, presentibus supplicavimus apponi in testimonium premissorum. Et nos prenominatus episcopus Matisconensis, ad supplicationem predictorum fratrum qui premissa coram nobis confessi sunt et promiserunt, prout superius sunt expressa, presentibus sigillum nostrum apposuimus in testimonium veritatis. Datum anno Domini M^o CC^o septuagesimo, mense maii.